ڈیلی دومیل نیوز.جلال آباد (نامہ نگار) — چوکی پولیس جلال آباد نے معمول کی چیکنگ کے دوران ایک بڑی کارروائی کرتے ہوئے مضر صحت اور غیر معیاری پاپڑوں کی بھاری مقدار برآمد کر لی۔
پولیس کے مطابق دوران گشت ایک مشکوک گاڑی کو روکا گیا جس کی تلاشی لینے پر پاپڑوں سے بھرے کئی تھیلے برآمد ہوئے۔ ابتدائی تحقیقات میں ان پاپڑوں میں غیر معیاری اجزاء اور حفظان صحت کے اصولوں کی سنگین خلاف ورزیاں پائی گئیں، جو انسانی صحت کے لیے نقصان دہ اور خطرناک امراض کا باعث بن سکتے ہیں۔
پولیس نے مال کو قبضے میں لے کر مزید تفتیش شروع کر دی ہے، جبکہ گاڑی کے ڈرائیور اور مالک سے بھی پوچھ گچھ جاری ہے تاکہ معلوم ہو سکے کہ یہ اشیاء کہاں سے لائی جا رہی تھیں اور کہاں سپلائی ہونا تھیں۔
عوام سے اپیل کی گئی ہے کہ کھانے پینے کی اشیاء خریدتے وقت معیار اور لیبلنگ کا خاص خیال رکھیں اور کسی بھی مشکوک چیز کی اطلاع فوراً پولیس یا متعلقہ اداروں کو دیں تاکہ آزاد کشمیر بھر سے غیر معیاری اور صحت دشمن کاروبار کا خاتمہ کیا جا سکے۔
