(ڈیلی دومیل نیوز)فیلڈ مارشل سید عاصم منیر کی کامیاب سفارت کاری نے پاکستان کو بین الاقوامی سطح پر نئی بلندیوں تک پہنچا دیا ہے۔ معروف امریکی جریدے واشنگٹن پوسٹ نے اپنی حالیہ رپورٹ میں پاکستان اور امریکا کے تعلقات کو ایک نئی مثبت جہت قرار دیتے ہوئے اس پیش رفت کو فیلڈ مارشل عاصم منیر کی مؤثر قیادت اور کامیاب حکمت عملی کا نتیجہ بتایا ہے۔
رپورٹ میں کہا گیا کہ فیلڈ مارشل عاصم منیر کا حالیہ دورہ امریکا پاک، امریکا تعلقات میں “ایک نئی جہت کی علامت” بن چکا ہے۔ بدلتے ہوئے عالمی حالات اور امریکی صدر ڈونلڈ ٹرمپ کے ممکنہ دوبارہ انتخاب کے تناظر میں پاکستان کو درپیش سفارتی چیلنجز کو دانشمندانہ حکمت عملی کے ذریعے کامیابی سے نمٹایا گیا اور وائٹ ہاؤس کے ساتھ قریبی روابط کو فروغ دیا گیا۔
واشنگٹن پوسٹ کے مطابق پاکستان نے انسداد دہشتگردی میں نمایاں اقدامات کیے ہیں، جن کے نتیجے میں امریکا نے کالعدم تنظیم بی ایل اے کو عالمی دہشتگرد تنظیم قرار دیا۔ یہ پیش رفت پاکستانی سفارت کاری کی ایک بڑی کامیابی کے طور پر دیکھی جا رہی ہے۔
مزید برآں، رپورٹ میں انکشاف کیا گیا ہے کہ پاکستان نے امریکا کو کرپٹو کرنسی منصوبوں اور معدنی وسائل کی ترقی میں شراکت داری کی پیشکش کی ہے۔ صدر ڈونلڈ ٹرمپ نے پاکستان میں مختلف شعبوں میں سرمایہ کاری میں دلچسپی ظاہر کی ہے، جو دونوں ممالک کے درمیان معاشی تعلقات کے ایک نئے دور کا آغاز ثابت ہو سکتا ہے۔
