اسلام آباد ہائی کورٹ نے اسد قیصر کی درخواست پر وزارت داخلہ اور دیگر کو نوٹس جاری کر دیئے۔

اسلام آباد: اسلام آباد ہائی کورٹ نے پاکستان تحریک انصاف (پی ٹی آئی) کے رہنما اور سابق اسپیکر قومی اسمبلی اسد قیصر کے خلاف درج مقدمات کی تفصیلات فراہم کرنے کے لیے وزارت داخلہ اور دیگر فریقین کو نوٹس جاری کردیے۔

اسلام آباد ہائیکورٹ کے جسٹس سمن رفعت امتیاز نے اسد قیصر کی درخواست پر سماعت کی۔

درخواست گزار کی وکیل عائشہ خالد عدالت میں پیش ہوئیں اور خدشہ ظاہر کیا کہ درخواست گزار کو ایسے کیس میں گرفتار کیا جا سکتا ہے جس کا پہلے سے علم نہیں تھا۔

ملک بھر کے تھانوں میں درج مقدمات یا قومی احتساب بیورو (نیب) اور وفاقی تحقیقاتی ادارے (ایف آئی اے) میں مقدمات، انکوائریوں اور انویسٹی گیشنز کی تفصیلات فراہم کرنے کا حکم دیا جائے۔

عدالت نے فریقین کو نوٹس جاری کرتے ہوئے سماعت ملتوی کر دی۔ کیس کی اگلی سماعت رجسٹرار آفس طے کرے گا۔ درخواست میں وزارت داخلہ، اسلام آباد اور چاروں صوبوں کے آئی جیز، چیف کمشنر، نیب اور ایف آئی اے کو فریق بنایا گیا ہے۔