اسلام آباد: وفاقی حکومت نے وفاقی سیکریٹری وزارت اطلاعات و نشریات ظہور احمد کو ان کے عہدے سے ہٹانے کا فیصلہ کرلیا۔
ذرائع کے مطابق سیکرٹریٹ گروپ BS-21 کے افسر اور وزارت اطلاعات کے انچارج ایڈیشنل سیکرٹری ظہور احمد کو عہدے سے ہٹا کر اسٹیبلشمنٹ ڈویژن رپورٹ کرنے کی ہدایت کی جائے گی۔
ان کی جگہ انفارمیشن گروپ گریڈ 22 کی او ایس ڈی شاہیرا شاہد کو وزارت اطلاعات کا سیکرٹری تعینات کرنے کا فیصلہ کیا گیا ہے۔ شاہیرا شاہد اس سے قبل سیکرٹری اطلاعات بھی رہ چکی ہیں۔
ذرائع کے مطابق سیکرٹری اسٹیبلشمنٹ ڈویژن نے معلومات کے تبادلے کے لیے الیکشن کمیشن آف پاکستان (ای سی پی) کو خط بھیجا ہے۔ اسٹیبلشمنٹ ڈویژن کے ذرائع کے مطابق ای سی پی کی منظوری کے بعد اسٹیبلشمنٹ ڈویژن وزیراعظم آفس سے باضابطہ منظوری لے کر ان تقرریوں اور تبادلوں کا نوٹیفکیشن جاری کرے گا۔
