مظفرآباد (خصوصی رپورٹر): دارالحکومت مظفرآباد کے اہم ترین داخلی و خارجی راستے “نلوچھی پل” کے مقام پر ضلعی انتظامیہ اور پولیس نے مشترکہ کارروائی کرتے ہوئے 7 خواتین کو حراست میں لے لیا ہے۔ ضلعی انتظامیہ کے مطابق، گرفتار کی جانے والی خواتین ‘امن مارچ’ کے نام پر نلوچھی پل کے قریب سڑک کو بلاک کرنے کی کوشش کر رہی تھیں، جو کہ شہر میں نافذ العمل دفعہ 144 کی کھلی خلاف ورزی ہے۔
لیڈیز پولیس کا ایکشن اور دفعہ 144 کی خلاف ورزی
انتظامیہ کا مؤقف ہے کہ شہر میں امن و امان کی نازک صورتحال کے پیشِ نظر کسی بھی قسم کے احتجاج، مارچ، روڈ بلاک کرنے یا مجمع اکٹھا کرنے پر پابندی (دفعہ 144) عائد ہے۔ جب خواتین کے ایک گروپ نے نلوچھی پل کی اہم شاہراہ کو بند کر کے ٹریفک کی روانی کو معطل کرنے کی کوشش کی، تو موقع پر موجود لیڈیز پولیس نے فوری ایکشن لیتے ہوئے تمام 7 خواتین کو حراست میں لے کر تھانے منتقل کر دیا۔
ایکشن کمیٹی سے تعلق کا سوال
اس حساس کارروائی کے بعد عوامی اور صحافتی حلقوں میں یہ سوال تیزی سے گردش کر رہا ہے کہ کیا ان گرفتار خواتین کا تعلق حکومت کی جانب سے کالعدم قرار دی گئی “جوائنٹ عوامی ایکشن کمیٹی” (JAAC) سے ہے؟
اس اہم سوال پر ضلعی انتظامیہ اور پولیس حکام نے اپنا باضابطہ مؤقف دیتے ہوئے کہا ہے کہ “تاحال اس امر کی تفتیش کی جا رہی ہے کہ ان خواتین کا تعلق کس گروپ یا تنظیم سے ہے۔” پولیس کے مطابق خواتین سے تفتیش کا عمل جاری ہے اور ان کے نیٹ ورک یا محرکات کا پتہ چلتے ہی میڈیا کو باقاعدہ آگاہ کیا جائے گا۔
