منشیات کے سمگلروں کیخلاف کریک ڈاؤن شروع

ڈیلی دومیل نیوز.وزیر اعلیٰ پنجاب کے منشیات سے پاک صحت مند اور محفوظ پنجاب ویژن کے تحت نئی تشکیل دی گئی پنجاب نارکوٹکس کنٹرول فورس نے صوبے بھر میں منشیات کی سمگلنگ اور فروخت کے خلاف کریک ڈاؤن شروع کر دیا۔
دو ہفتوں کے دوران انٹیلی جینس کی بنیاد پر 40 کاروائیاں کرکے منشیات کے 30 سمگلر گرفتار کر لئے گئے جن میں3 عورتیں بھی شامل ہیں۔ فورس کی کاروائیوں کے دوران اشتہاری ملزمان کی طرف سے فائرنگ کے نتیجے میں ایک اشتہاری ملزم ہلاک ہو گیا جو 8 مقدمات میں مطلوب تھا۔ ان میں 4 منشیات کے مقدمات اور 1 دفعہ 302 کا مقدمہ شامل ہیں۔
کاؤنٹر نارکوٹکس فورس نے دو ہفتے کے دوران 70 کلوگرام منشیات قبضے میں لے لیں۔اس کے علاوہ ممنوعہ بور کا اسلحہ، موبائل فون، لیپ ٹاپ، نقدی اور دیگر سامان بھی قبضے میں لیا گیا۔کاؤنٹر نارکوٹکس فورس نے لاہور، راولپنڈی، ملتان، فیصل آباد، ڈیرہ غازی خان، گوجرانوالہ، بہاولپور، رحیم یار خان، ساہیوال اور شیخوپورہ میں کاروائیاں کیں اورمنشیات فروشوں کے خلاف 19 مقدمات درج کر لئے گئے۔