لاہور ہائیکورٹ نے پی ٹی آئی کی لبرٹی چوک میں جلسے کی اجازت کی درخواست پر ڈپٹی کمشنر کو کل تک فیصلہ کرنے کی ہدایت کردی،عدالت نے کہاکہ ڈپٹی کمشنر کل تک فیصلہ کرکے بتائیں کہ اجازت دینی ہے یا نہیں؟
لاہور ہائیکورٹ میں پی ٹی آئی کو لبرٹی چوک پر جلسہ کی اجازت نہ دینے کی درخواست پر سماعت ہوئی،پی ٹی آئی کی جانب سے موقف اختیار کیا گیا تھا کہ 15 اکتوبر کو لبرٹی چوک پر جلسہ کرنے کیلئے ڈی سی لاہور کو درخواست دی تھی تاحال ڈی سی لاہور نے درخواست پر کوئی فیصلہ نہیں کیا، عدالت ڈپٹی کمشنر کو پی ٹی آئی کو جلسہ کرنے کی اجازت کا حکم جاری کرے۔
دوران سماعت عدالت نے پنجاب حکومت کے وکیل سے استفسار کیا کہ بتائے کیا مسئلہ ہے کیوں ابھی تک اجازت نہیں دی ؟عدالت نے ڈپٹی کمشنر کو کل تک درخواست پر فیصلہ کرنے کی ہدایت کردی،عدالت نے کہاکہ ڈپٹی کمشنر کل تک فیصلہ کرکے بتائیں کہ اجازت دینی ہے یا نہیں؟
جسٹس راحیل کامران نے کہاکہ اگر اجازت نہیں دینی تو کن وجوہات کی بنا پر نہیں دینی؟عدالت نے پنجاب حکومت کے وکیل کو کل تک رپورٹ پیش کرنے کی ہدایت کر دی۔
