(ڈیلی دومیل نیوز) پاکستان اور سعودی عرب نے نوجوانوں کے لیے آئی ٹی اور کھیلوں کے شعبوں میں تعاون بڑھانے پر اتفاق کیا ہے۔
جمعہ کے روز کراچی میں گورنر سندھ کامران خان ٹیسوری اور سعودی شہزادہ منصور بن محمد آل سعود کی موجودگی میں دو اہم یادداشتوں پر دستخط کیے گئے۔ معاہدوں کے تحت دونوں ممالک نوجوانوں کو آئی ٹی تعلیم اور کھیلوں میں زیادہ سے زیادہ مواقع فراہم کریں گے۔ اس موقع پر سعودی سفیر نواف سعید المالکی، قونصل جنرل محمد عبداللہ السبیعی، سعودیہ میں تعینات پاکستانی سفیر احمد فاروق اور دیگر اراکینِ وفد بھی شریک تھے۔
گورنر سندھ کامران خان ٹیسوری نے کہا کہ تعلیم، ٹیکنالوجی اور کھیل کے فروغ سے ہی قوم کا روشن مستقبل ممکن ہے۔ انہوں نے بتایا کہ پاکستان اور سعودی عرب کی کرکٹ ٹیموں کے درمیان جلد ایک دوستانہ میچ بھی ہوگا۔ بعد ازاں گورنر سندھ نے شہزادہ منصور بن محمد آل سعود اور ان کے وفد کو کراچی ایئرپورٹ پر الوداع کہا۔ شہزادہ منصور بن محمد آل سعود نے گورنر سندھ کی میزبانی اور گرمجوشی پر شکریہ ادا کیا اور ان کی کاوشوں کو سراہا۔
