ڈیلی دومیل نیوز،پاکستان ٹیلی کمیونیکیشن اتھارٹی نے آزاد کشمیر اور گلگت بلتستان کے علاقوں میں موبائل فون آپریٹرز کی کارکردگی کو چیک کرنے کے لیے چوتھی سہ ماہی کا مشترکہ ‘کیو او ایس’ سروے مکمل کر لیا ہے۔ اس اہم سروے کو کرنے کا اصل مقصد یہ ہے کہ دور دراز کے علاقوں میں رہنے والے لوگوں کو وائس کالز، ایس ایم ایس اور موبائل انٹرنیٹ کی بہترین سہولیات مل سکیں۔ پی ٹی اے اس بات کو یقینی بنانا چاہتا ہے کہ صارفین کو کنیکٹیویٹی کے حوالے سے کسی مشکل کا سامنا نہ کرنا پڑے۔
پی ٹی اے کی جاری کردہ رپورٹ کے مطابق آزاد کشمیر کے چار بڑے شہروں مظفرآباد، کوٹلی، راولاکوٹ اور پلندری میں جدید مانیٹرنگ ٹولز استعمال کر کے ڈیٹا جمع کیا گیا۔ اسی طرح گلگت بلتستان کے پانچ شہروں استور، گلگت، غذر، ہنزہ اور شگر میں بھی یہ سروے کیا گیا۔ سروے کے نتائج بتاتے ہیں کہ زیادہ تر موبائل کمپنیاں 4 جی اور ایل ٹی ای سگنل کی طاقت اور معیار کو برقرار رکھنے میں کامیاب رہی ہیں۔
